ஃபீனிக்ஸ் பறவையல்ல இவள்....

வீழ்தல் என்பது தவறி வீழ்தல்
பற்றியதை அற்று வீழ்தல்
பொய்த்துப் போன நா எரியும்
கற்களிடறி வீழ்தல்
எண்ணிலடங்கா வீழ்ச்சிகளின் பாரம் 
பூமி புதைந்துவிடவில்லை
சுழன்று கொண்டேயிருக்கிறது

போராட்டமே வாழ்வென்றது
தாடி வைத்த கம்யூனிச பூதம்
ஒடுக்கும் புற உலகோ
ஒடுக்கப்படும் அக உலகோ
அடங்க மறு
போர் தொடு

நிலம் செழிக்க
வா
இருவரும் உழவு செய்வோம்
ஒரு கை ஓசை
சொடுக்கும் அதிகாரம்
இரு கை சேர்கையில்
வெற்றிக் களிப்பு

காத்திருத்தலும்
மௌனித்திருத்தலும்
நிபந்தனைகளற்று முந்தானை விரித்தலுமே
காதலென்றால்
வேசை என்னும் சொல்லுகுரிய
ஆண்பால் சொல்லை
உருவாக்காத இச்சமூகத்தின்
குறிகளை அறுத்தெரியும்
வல்லமை முலைகளுக்குண்டு

பெண்
அன்பு காட்டுவதும்
அறிவு காட்டுவதும்
தேவதையாவதும்
நீலியாவதும்
ஆண் நாவின் நீளம் பொறுத்தது

வீழ்கையில்
மன் சுமக்கிறது
மண் கரைக்கிறது
மண் முத்தமிடுகிறது
கசியும் ஈரம் போதும்

விழ விழ
எழும்
ஃபீனிக்ஸ் பறவை
அல்ல இவள்
வீழும் விதை
ஒற்றை மரமோ
அடர் காடோ

(ஓவியம்: ஃப்ரீதா காலோ - https://www.fridakahlo.org/marxism-will-give-health-to-the-…)