வாழ்க்கையின் சொல் என்னவாக இருக்கும்

வாழ்க்கையின் சொல் என்னவாக இருக்கும்

ழ வோடு புள்ளியும் தொடர்கிறது

பறவை என உடையாமல் எழுத
ஓர் எழுதுகோல் தேவை
அதில் மைக்கு பதில்
மௌனத்தை நிரப்பித் தாருங்கள்

நான் எழுத வேண்டுவது பாறைகளில்
பாறைகளுக்குச் சொல் பிடிக்காது
குழந்தை போல் சிரிக்கும் அதன் வாயில்
வேட்டையாடிக்கு மட்டும் கதவு திறக்கிறது

டாலியின் கடிகாரம் உருகி வழிகையில்
இருளுக்குப் பசிக்கிறது
சொல்லூட்டி பழக்கப்பட்ட கைகள்
இசைப்பதோ
ஓவியம் வரைவதோ
பறவையைத் தேடுவதோ
கடவுளருக்கு மனிதர்களை அறிமுகம் செய்வது போன்றதாகும்

மனிதர்கள் மொழியைப் படைக்கிறார்கள்
கடவுளர்கள் பெருங்காதலோடு
இடுகாட்டை கட்டியெழுப்புகிறார்கள்